Մտածու՞մ ենք արդյոք առօրեայում, թե որքան է մեր կյանքն իրականում կախված մեր էմոցիաներից:
Ահա, թե ինչ է տեղի ունենում մեզ հետ մշտապես. կյանքում ամեն պահի տեղի ունեցող իրադարձություններին մենք որոշակի էմոցիոնալ արձագանք ենք տալիս: Այդ արձագանքով պայմանավորված մենք կայացնում ենք որոշումներ և կատարում գործողություններ: Իսկ մեր որոշումներն ու գործողություններն էլ հանգեցնում են նոր իրադարձությունների: Եվ այդպես շարունակ… Այդպես անդադար:
Եվ քանի որ մեր էմոցիաները կառավարում են մեր կյանքը, միանշանակ արժե մտածել այն ուղղությամբ, թե ինչպես մենք ինքներս գիտակցորեն կառավարենք մեր էմոցիաներն ու մեր արձագանքը մեր էմոցիաներին:
Այս գրքում հեղինակը մատչելի լեզվով պատմում է մեզ, թե ինչ է էմոցիոնալ ինտելեկտը և որքան մեծ նշանակություն ունի այն մարդու կյանքի յուրաքանչյուր ոլորտում: Տեսական գիտելիքների և օրինակների միջոցով հեղինակը օգնում է մեզ «Ճիշտ» մոտեցում ձևավորել ինքներս մեր և ուրիշների էմոցիաների նկատմամբ, զարգացնել ապրումակցման ունակությունը, կառավարել մեր կյանքում ծագող հնարավոր իրավիճակների հետևանքները, ստեղծել և պահպանել լավ հարաբերություններ այլ մարդկանց հետ:
Գրքում ներկայացված է էմոցիոնալ ինտելեկտի հետ կապված հիմնական հասկացություններն ու հիմնական բանալիները դեպի մարդկային էմոցիաների՝ ոչ միանշանակ և անսահման աշխարհ: Գիրքը բավականին պարզ է և շատ հարմար որպես առաջին գիրք, որի միջոցով ընթերցողն ընդհանուր պատկերացում կկազմի և կձևավորի հետաքրքրություն «էմոցիոնալ ինտելեկտ» հասկացության նկատմամբ: Մի շնչով ընթերցվող այս հակիրճ և մատչելի գիրքը նաև կյանքի ցանկացած իրավիճակում կարող է ծառայել որպես հիշեցում, թե որքան կարևոր է կառավարել ինքներս մեզ և հասկանալ մյուսներին:
Արմինե Հակոբյանի ստեղծագործական բլոգ 