Լավի ու վատի մասին յուրաքանչյուրս ի սկզբանե ունենք մեր պատկերացումները, ըստ այդմ՝ որոշ մտքեր, գործողություններ, սովորություններ, զգացողություններ, մարդկանց փորձում ենք դուրս մղել մեր կյանքից, իսկ որոշներն՝ ավելացնել: Իսկ նրանց, ովքեր ինչ-որ կերպ առնչվել են հոգևոր գիտելիքին, ծանոթ է առօրյա «լավ» ու «վատ» հասկացությունների համարժեք՝ երեք գունաների երևույթը՝ տամաս, ռաջաս և սատվա:
Տամասը ցածրագույն էներգիան է՝ քայքայումը, անգործությունն ու կործանումը, ռաջասը՝ կրքի, ակտիվության և նյութական ձգտումների էրերգիան է, իսկ սատվան բարձրագույն էներգիան է՝ ներդաշնակությունը, հանդարտությունը, ներքին խաղաղությունը:
Ուզենք, թե՝ ոչ, մեր յուրաքանչյուր միտք, խոսք կամ արարք պատկանում է այս կամ այն գունային և համապատասխան ազդեցությունն է ունենում մեր կյանքի վրա:
Ռամի Բլետկի այս գրքում հանգամանալից ներկայացվում են 3 գունաների դրսևորումները կյանքի բոլոր ոլորտներում՝ սնունդ, օրվա ռեժիմ, հարաբերություններ և այլն: Հեղինակը շատ պարզ, հստակ լուծումներ է տալիս, թե ինչպես կարող ենք բարձրացնել այս էներգիաները մեր կյանքում և բարելավվել մեր առողջությունը, բերել մեր կյանք հաջողություն և ներդաշնակություն:
Այս գիրքը կառաջարկեմ կարդալ՝ ձեռքում ունենալով գրառումների տետր և գրի առնելով այն խորհուրդները, որոնց իրատեսական եք համարում հետևել հենց դուք: Իսկ խորհուրդները, սկսվում են ամենապարզունակներից (լոգանք ընդունելու, սնվելու, քնելու նախընտրելի ժամեր և այլն) ու կարող են մեծ փոփոխություններ բերել յուրաքանչյուրի կյանք:
Եվ այս դեպքում այս գիրքը միանշանակ կդասվի այն գրքերի շարքին, որոնք կարող են փոխել ընթերցողի կյանքն անմիջապես, հենց կարդալու ընթացքում:
Բարի ընթերցանություն:
Արմինե Հակոբյանի ստեղծագործական բլոգ 