Երբ ես հայտնվում եմ մի իրավիճակում, որն իմ սրտով չէ, նախքան շտապելը կտրուկ քայլեր անել այն փոխելու ուղղությամբ, ես հանգիստ ու անշտապ ինձ երկու հարց եմ ուղղում. ի՞նչ է ասում այդ իրավիճակը կամ ի՞նչ դաս է այն իր հետ բերել: Այս հարցի պատասխանը ստանալուց հետո անցնում եմ երկրորդ հարցին. ինչպե՞ս այդ Դասը սովորել… Եվ հետո սկսում եմ գործել:
Ու եթե մտքիս ուղղությունը ճիշտ է, իրավիճակն աստիճանաբար դուրս է մղվում իմ կյանքից, անգամ՝ առանց ուղղակի գործողությունների: Տարվա եղանակների հերթափոխի պես անխափան գործում է նաև տիեզերական այս օրենքը: Եվ այն բազմիցս գործել է իմ կյանքում 2023-ին:
Եվ այդ փորձի շնորհիվ լիովին այլ իմաստ է ստանում «Դժվար է» բառը: «Դժվար է»-ն ոչ թե պատիժ, դատավճիռ կամ հանձնվելու առիթ է, այլ՝ քո բարձր «Դասարանում» գտնվելու տիեզերքի հավաստում: Եվ դժվար իրավիճակները ես ընդունում եմ առանձնահատուկ շնորհակալությամբ, դժվար իրավիճակներում գործում եմ մեծ պատասխանատվությամբ և յուրահատուկ ոգևորությամբ:
Այս մտքերով հրաժեշտ տալով 2023-ին և դիմավորելով 2024-ը՝ բոլորիս մաղթում եմ, որ 2024-ին և ՄԻՇՏ մեր կյանքում ծագած դժվարությունները լինեն շատ կարճաժամկետ, իսկ դրանց շնորհիվ ձեռք բերված իմաստությունը՝ հավերժական:
Ուրախ տարեմուտ, սիրելիներս:
Արմինե Հակոբյանի ստեղծագործական բլոգ 