Հեռանում եմ քեզանից,
և քո կողքին իմ տաքացրած տեղը սառչում է
Հեռանում եմ ես մեծ ջանքերով իմ տաքացրած տեղից,
Ի սկզբանե սառն ու անհարմար տեղից
Ի սկզբանե իմ էության համար անհնար տեղից
Եվ Աստծո օգնությամբ տաքացրած, հարմարեցված
ու գրեթե արդեն սիրված տեղից
Հեռանում եմ ես հետևում թողնելով երկար ճանապարհ`
քեզ հետ իմ անցած ուղին, որից շատ անգամներ
ուժասպառ եղած մտածել եմ ետ դառնալ,
բայց գերբնական ինչ-որ մղումով և անգիտակցաբար,
տկար և հոգնած ես շարունակել եմ…
Առանց ոչ մի հիմք` հույս եմ ունեցել
Առանց խոստումի` հավատացել եմ…
Եվ տեղ եմ հասել…
Քո կողքին իմ սառն ու անհարմար տեղը ես տաքացրել եմ
Տաքացրել եմ մեծ աշխատանքով, ցավով, հուզմունքով,
տարակուսանքով և շատ զոհերով` անթիվ, անհամար…
Հեռանում եմ ես, և տաքացրած տեղս օրեցօր սառչում է…
Եվ եթե այն սառչի, ես ետ չեմ դառնա,
Նույն խորդուբորդ ճանապարհն էլ չեմ կրկնի
Եթե այն սառչի, այնուհետ հավետ սառը կմնա…