Ես միշտ համարել եմ, որ գրողի առաքելություններից մեկն էլ թարգմանությամբ զբաղվելն է. օտար լեզվով գրված գլուծգործոցները դարձնել մատչելի հայրենակիցների համար: Եթե տիրապետում ես գրելու արվեստին, ինչու՞ քեզ վրա չվերցնես այդ բարի գործի գոնե մի փոքր մասը:
Բայց այստեղ կա մի բայց… Ստեղծագործ միտք ունեցող մարդու համար երբեմն դժվար է թարգմանելիս պահպանել բնագրի հեղինակի ոգին: Ստեղծագործ մարդն անպայման իր գրչով գրված ցանկացած տողում իր հոգին է ներդնում: Այս վտանգը չկա այն դեպքերում, երբ գեղարվեստական ստեղծագործության թարգմանությամբ զբաղվում է պրոֆեսիոնալ թարգմանիչը, ով ինչը գրող չէ, ով երբևէ որևէ հեղինակային ստեղծագործություն չի գրել:
Որպես գրող, ով նաև իր ներդրումն է ցանկանում ունենալ ուրիշների կողմից գրված լավագույն ստեղծագործություններն իր մայրենի լեզվի վերածելու գործում, ես այս հակասությունն ինձ համար հետևյալ կերպ եմ լուծում: Այո, ես թարգմանում եմ, բայց միայն այն ստեղծագործությունները, որոնք առավելապես հոգեհարազատ են ինձ, որոնց մեջ որևէ բառ, որևէ ստորակետ ինքս չէի փոխի: Իհարկե, այդպիսի գրողների ես հաճախ չեմ հանդիպի, և թարգմանությունն իմ գործունեության մի փոքր մասն է կազմելու միայն, սակայն թարգմանելիս մեծ սիրով և նվիրվածությամբ եմ ստանձնելու հեղինակի և հայալեզու ընթերցողի միջև միջնորդի դերը:
Եվ ահա այսօր, երբ արդեն պատրաստ է իմ կողմից թարգմանված առաջին պատմվածքը, ես բացում եմ իմ ստեղծագործական կայքում թարգմանություններին նվիրված այս բաժինը և սիրով Ձեզ եմ ներկայացնում այն: