Հանճարեղ ռեժիսոր Վուդի Ալլենի նոր ֆիլմի հերոսը կյանքի վերաիմաստավորման փուլում գտնվող 60ամյա գրող է:
Մորտի և իր սիրելի կնոջ Սյուիի ամուսնական կյանքի վառ երանգներն արդեն խամրել են, և ֆիլմի հերոսը կասկածում է, որ կինը սիրային հարաբերություններ ունի թեև երիտասարդ, բայց արդեն մեծ ճանաչում վայելող կինոռեժիսոր Ֆիլիպի հետ:
Մի կողմից տարիքային ճգնաժամը, մյուս կողմից էլ այդ կասկածները նպաստում են, որպեսզի Մորտը խորապես տրվի անցյալի հիշողություններին՝ վերագնահատելով հարաբերություններն իր հանդիպած կանանց հետ, հարազատների վերաբերմունքը, իր կատարած և չկատարած արարքները, կյանքում ունեցած դերերն ու չգրված գրքերը… Բնականաբար, ֆիլմի հերոսի կյանքը միշտ չէ, որ ուղեկցվել է հաջողություններով …
Այս սյուժեով ֆիլմը կարող էր լինել չափազանց դեպրեսիվ, սակայն ոչ այս դեպքում, երբ ռեժիսորը Վուդի Ալլենն է…
Անգամ էքզիստենցիալ թեմաներ շոշափելու դեպքում կինոդիտողին դրական էմոցիաներ պարգևելու մեծ վարպետը կարողանում է պահպանել հումորն ու թեթևությունը:
Եվ ինչպես ռեժիսորի մյուս ֆիմները, այս մեկը ևս կարող եք վայելել երեկոյան՝ ազատվելով օրվա ընթացքում կուտակված ողջ ծանրությունից:
Արմինե Հակոբյանի ստեղծագործական բլոգ 